Wê weşanxaneyên Kurd komxebetekê li dar bixin

Rêveberê DTSOyê Farûk Korkmaz da zanîn ku yekem care hemû weşangerên kurd di pêşengeha Amedê de hatine gel hev û derfet çêbû ye ku li ser pirsgirêkên xwe yên cûr be cûr biaxivin.

Her weha Korkmaz diyar kir ku ew dixwazin hin derfetan ji bo weşangerên Kurd biafirînin û wiha pê de çû:

“Ji xistina lêçûnên çapkirina pirtûkan heta avakirina xet û xebateke hevpar ya weşangeriya Kurdî de nîqaş û plansaziyeke xurt bê kirin.Wê plansaziya komxebatê di mehên pêş de bê diyarkirin.” 

Em ê ji bo wêjeya zarokan xebateke hevpar bikin

Derbarê komxebata ku wê di mehên pêş de bê lidarxistin de xwediyê weşanxaneya J&Jyê Azad Zal diyar kir ku wê komxebata ku bê lidarxistin dûrî nîqaşên siyasî yên teng be û wiha pê da çû:

“Daxwaz ew e ku em asta xwe û hewcehiyên xwe bibînin. Ka me çi kiriye, çi nekiriye, me çi kêm kiriye, çi şaş çêkiriye, lazim e em vê fêmbikin.

“Helbet her weşanxane xwedî polîtîkayeke cûda ye lê hin tişt hene ku lazim e di bin banî Kurd bûnê de, bi berpisîyariya hevpar bê meşandin, weke nimûne bibêjim, lazim e em di mijara wêjeya zarokan de xebateke hevpar bikin ku ji bo zarokên xwe wêjeyeke bir rengê xwe derbixin holê.”

Edîtorê Nûbiharê Suleyman Çevîk, Edîtor û nivîskarê Weşanxaneya Lîsê Lal Laleş, edîtorê Weşanxaneye Morî yê ku hew pirtûkên zaroka diweşînin Mem Bawer, ji Weşanxaneya Avestayê Songul Keskîn û gelek weşanxaneyên din wê piştgiriyê bidin amadekirina komxebatê û tevlî komxebatê bibin. 

(BA/AY)