Kovara kitêb çand û hunera Kurdî ya bi navê Kund, dest bi weşanê kir. Kovar wê ji sê mehan carekê derkeve û rûpelên xwe ji mijarên populer re veke.
Di hejmara Gulan-Hezîran-Tîrmeh a 2018ê de kovarê nivîskar Bextiyar Eliyî kiriye mijara dosyaya taybet.
Li gel “Axavtina Bextiyar Eliyî ya ji bo Wergirtina Xelata Nelly-Sachsê”, nivîsa Bajar Mîrzemanî ya bi navê “Derketin wek Gera li Azadiyê di Romanên Bextiyar Eliyî de”, ya Umran Aranî ya bi navê “Hinara Dawî ya Dinyayê: Qiyameteke Xweşik”, ya Ferzan Şêrî a bi navê “Arkadaş Yilmaz Guney û Heval Bextiyar Elî” û hin nivîsên din di vê dosyayê de cî girtine.
Dîsa Yildiz Çakar, H. Kovan Baqî, Yaqob Tilermenî, Salih Agir Qoserî, Ciwanmerd Kulek, Xelîl Semed û gelek nivîskarên din bi nivîsên xwe di nava rûpelên kovarê de cî ji xwe re girtine.
"Kund kovareke populer e"
Desteya weşanê ya Kundê ji bianetê re behsa naveroka kovarê û armanca derxistina wê kir:
Bi gotina desteya weşanê, “Kund bi cureyê xwe kovareke populer e, yanî berê wê ne li zimreyeke taybet e, berê wê li temamê xwînerên kurdî ye û her kes dikare ji bo xwe tiştekî tê de bibîne” û “Motîvasyona Kundê ew e ku kovareke kurdî bi zimanekî sivik û bi giraniyeke li ser kitêban hebe. Di navenda vê kovarê de kitêb hene, lê di nasnava wê de huner û çand jî cih digirin. Huner daxwaza me ye, çand jî ji ber nivîsên hatî me lê zêde kir”.
"Naverok, rêbaz û dirûv wê ji yên din cudatir be"
Desteya weşanê, Kovara Kundê bi sê taybetiyên xwe ji kovarên Kurdî yên heta niha derketine cuda dinirxîne:
“Kund bi sê taybetiyên xwe, bi naverok, rêbaz û dirûvê xwe ji kovarên kurdî yên heta nuha derketî hinekî cuda dibe. Ji hêla naverokê ve cudahiya wê beşên wê yên curbicur û cihêreng in.”
Li gorî desteya weşanê Kund bi rêbaza xwe jî cîhereng e: “Kund dînamîk e. Ne tenê dînamîk e, înteraktîv e jî; rola xwîneran ji kovarên din bêtir e tê de. Mînak kesek dikare nivîsekê binivîse û ji me re bişîne, ev tiştekî asayî ye, lê dikare navê beşa nivîsê jî diyar bike. Em bibêjin kitêbekê dixwîne û ji wê kitêbê paragrafekê ji Kundê re dişîne, dixwaze navê beşê jî “kitêba ber destê min be”. An jî bergê deh kitêban û li bin wan ji her yekê ji wan hevokekê dişîne û dixwaze navê beşa nivîsê “kulîn” be. Ne tenê kesek em bibêjin çend kes dibêjin “em dixwazin li ser nifşê Hawarê dosyeyekê amade bikin.” Kund ê ji wan re bibêje kerem bikin û wan di “dosyeya mêvan” de biezimîne. Em ê bi kêfxweşî pêşwaziyê li pêşniyazên werê bikin. Ev yek ê hem xwîneran aktîftir bike hem jî bihêle fikrên afirîner derkevin holê.
Ji hêla dirûvê jî Kund li Bakur tekane kovara kurmancî ye ku bi vî ebatî û rengîn û biwêne tê çapkirin.”
Desteya weşanê ya Kundê ji Burhan Tek, Bajar Mîrzeman, Umran Aran, Vecdi Demir û Xelîl Semed pêk tê. (FD)