Li Amedê li dijî navendeke karî ku saziyên sivîl tê de ne êrîşeke çekdarî pêk hatiye

Ji bo nûçeya tirkî / ingilîzî bitikîne

Şeva berê li Yenîşehîra Amedê kesekî nasnameya wî nediyare bi çek êrîşî Nuyap Office Centerê kiriye. Li Nûyap Office Centerê gelek buroyên saziyên civaka sivîl hene.

Êrîşkarê ku ser û çavê wî niximandî bûye  bi şev saet di 01.00an de çûye pêşiya navenda karî û piştî ku 2 gule li deriyê avahiyê reşandiye reviye.

Di navenda karî de digel buroyên parêzeran û buroyên bazirganiyê, saziyên civaka sivîl yên weke Botan International, Piştevaniya Jinan (DAKAHDER), Kurdish Studies Center(KSC), Enstîtuya Lêkolînên Siyasî û Civakî ya Amedê (DISA), Komeleya Şêx Seîd hene.

RSF: Em dixwazin hemû aliyên êrîşê bên eşkerekirin

Digel ku nehatiye zanîn ev êrîş ji bo çi û ji bo kê hatiye kirin, saziyên azadiya derbirînê êrîşên ku tê texmînkirin li dijî rêxistinên civaka sivîl e, şermezar kirine.

Nûnerê Tirkiyeyê yê Rêxistina Rojnamegerên Sînornenas (RSF) Erol Onderoglûyî xwestiye ku ji bo tespîtkirin û cezakirina kiryarê êrîşê di zûtirîn demê de gavên pêwîst bên avêtin û gotiye, "Em dixwazin hemû aliyên êrîşê bên eşkerekirin."

Komeleya Rojnamegerên Dîcle Firatê jî daxuyaniyek da û wiha got: "Em êrîşê bi tundî şermezar dikin, dixwazin di zûtirîn dem de berpirsyar bên dîtin û cezakirin."

(HA/AY)