Wezareta Karên Navxweyî ragihand ku Hevşaredara Sêrtê Sofya Alagaş 'weke tedbîreke demkî' ji wezîfeyê hatiye girtin.
Di daxuyaniyê de hat gotin ku Waliyê Sêrtê Kemal Kizilkaya li şûna Hevşaredara Sêrtê Sofya Alagaşa ku 6 sal û 3 meh cezayê girtîgehê lê hatiye birîn weke 'Alîkarê Şaredar' hatiye erkdarkirin.
Li gorî nûçeya Ajansa Mezopotamyayê, polîsan avahiya bajêr dorpêç kirine û ji bo tayînkirin qeyûm hevşaredar agahdar kirine. Her weha alaya Tirkan li ser avahiya bajêr hatiye daliqandin, welatî li ber avahiyê kombûne.
6 sal 3 meh cezayê girtîgehê li Hevşaredara Sêrtê Sofya Alagaşê birîn
Çi bûbû?
Hevşaredara Sêrtê Sofya Alagaş di qonaxa ku karê rojnamegeriyê dikir de bi îdiaya ku “endama rêxistinê ye” doz lê hatibû vekirin. Duh(28ê Kanûnê) 7emîn danişîna doza Hevşaredara Sêrtê Sofya Alagaşê li 5emîn Dadgeha Cezayên Giran a Amedê hat lidarxistin.
Dadgehê 6 sal û 3 meh cezayê girtîgehê li Alagaşê birî.
Di hilbijartina herêmî ya 31ê Adara 2024an de DEM Partiyê li Sêrtê bi sedî 49,64ê dengan (37 hezar 216 deng) şaredarî bi dest xistibû.
Wezareta Navxweyî piştî hilbijartina 31ê Adara 2024an qeyûm ji bo şaredariyên DEM Partiyê yên Colemêrg, Mêrdîn, Êlih, Dêrsim, Xelfetî, Akdenîz, Miks û Sêrtê tayîn kiriye.
(VC/AY)