Li Mêrdînê gel li dijî xespkirina îradeya xwe li ser pêyan e

Duh Wezareta Navxweyî tevî Şaredariyên Êlih û Xelfetiyê qeyûm tayînî Şaredariya Bajarê Mezin a Mêrdînê jî kir. Berxwedana gel a li dijî tayînkirina qeyûm li Mêrdînê didome.

Wesîla Torî

Wezareta Karên Navxweyî duh(4ê Mijdarê) qeyûm tayînî Şaredariyên Bajarê Mezin ê Mêrdîn, Êlihê û Şaredariya Xelfetiyê kir. Her sê şaredarî di bin rêveberiya Partiya Demokrasî û Wekheviyê ya Gelan(DEM) de ne.

Piştî Colemêrg û Esenyurtê Wezareta Navxweyî qeyûm ji bo Şaredariyên Mêrdîn, Êlih û Xalfetiya Rihayê kir.

Polîsan di saetên serê sibehê de avahiya şaredariyê dorpêç kirin. Li ser vê yekê gel li her sê şaredariyan jî berê xwe dan ber deriyê şaredariyan û dest bi çalakiyan kirin.

Li Şaredariya Bajarê Mezin a Mêrdînê jî bi agahiya tayînkirina qeyûm re gel berê xwe da ber şaredariyê.

Ji dayik, jin û zarok û ciwan û siyasetmedaran heta gelek sazî û dezgehên sivîl û siyasî ji serê şeveqê heta derengî şevê bi dirûşm û pankartên wek ‘Qeyûm xesp e’ bertek û nerazîbûnên xwe anîn ziman.

Xwepêşander bi bianet kurdiyê re axivîn û bertekên xwe anîn ziman.