Heyeta Îmraliyê bi Nêçîrvan Barzanî re civîya: Pêdiviya gelê Kurd bi çareseriyê heye

Civîna DEM Partiyê a bi Nêçîrvan Barzanî re di saet 10.00an de dest pê kir û 45 xulek berdewam kir. Piştî civînê Hevserokê Partiya Herêmên Demokratîk (DBP) Keskîn Bayindir got, “Birêz Nêçîrvan Barzanî dê piştgiriyeke mezin bide vê pêvajoyê.”

Heyet ji Pervîn Buldan û Sirri Sureyya Onder, Hevserokê DBPyê Keskîn Bayindir, endamên Buroya Hiqûqê ya Sedsalê Ozgur Erol û Îbrahîm Bilmez, Hevberdevkê Komîsyona Pêwendiyên Derve ya DEM Partiyê Berdan Ozturk û parlamenterên DEM Partiyê Gulcan Kaçmaz Sayyîgît û Mehmet Kamaç pêk tê.

Serokê Herêma Kurdistanê Nêçîrvan Barzanî û Heyeta Îmraliyê îro li Hewlêrê civiyan.

“Birêz Barzanî ji bo pêvajoya aştiyê xwedî helwesteke neteweyî ye”

Hevserokê Partiya Herêmên Demokratîk (DBP) Keskîn Bayindir piştî civînê got:

“Me silav û hezkirina Birêz Ocalan gihandin Birêz Nêçîrvan Barzanî. Me peyama Birêz Ocalan pêşkêşî Birêz Nêçîrvan Barzanî kir. Birêz Nêçîrvan Barzanî ji bo pêvajoya aştiyê xwedî helwesteke neteweyî ye û dê piştgiriyeke mezin bide vê pêvajoyê.”

Keskîn Bayindir destnîşan kir ku “Hêviya gelê Kurd heye” û got:

“Hemû partî, rêxistin û serokên Kurdistanê xwedî helwest in û bawer dikin ku dê pêvajoya aştiyê bi pêş bikeve. Em ji piştgiriya Rêzdar Nêçîrvan Barzanî gelekî memnûn in û em spasiyên xwe pêşkêşî wî dikin."

Şandeya DEM Partiyê ya Îmraliyê piştî hevdîtinên xwe yên bi Abdullah Ocalan re serdanên xwe didomîne.

Heyet duh bi Serok Mesûd Barzanî re civiyabû û îro ji bi Serokê Herêma Kurdistanê Nêçîrvan Barzanî re civiya.

Heyet dê sibe jî here Silêmaniyê û bi Serokê Yekîtiya Niştimanî ya Kurdistanê (YNK) Bafil Talebanî, Cîgirê Serokwezîr Qubad Talebanî û rayedarên YNKyê re bicive.

*Çavkanî: Rûdaw, MA